विराटनगर/नेपाल प्रहरीले सुनसरी जिल्लाको कोशी गाउँपालिका–७ हरीपुरमा ठूलो मात्रामा अवैध गाँजा बरामद गरेको छ। इलाका प्रहरी कार्यालय भाण्टावारी र अस्थायी प्रहरी पोष्ट हरिपुरको टोलीले पूर्वबाट पश्चिमतर्फ जाँदै गरेको ट्रक (प्रदेश १–०२–००२ ख ०४१४) मा लुकाएर राखिएको ३४० किलो गाँजा बरामद गरेको हो।

प्रहरीका अनुसार, शंका लागि ट्रक रोकेर जाँच गर्दा चालक भने गाडी छाडेर फरार भएका थिए। प्रहरीले उक्त ट्रकको छतमा फल्स बटम बनाई लुकाइराखेको अवस्थामा गाँजा भेटेको जानकारी दिएको छ।

यस घटनासँग सम्बन्धित अनुसन्धान अघि बढाइएको र फरार चालकको खोजी जारी रहेको सुनसरी प्रहरी कार्यालयले जनाएको छ।