विराटनगर / विराटनगरमा आगामी २०२४ डिसेम्बर २० र २१ (२०८१ साल पुस ५ र ६) गते अन्तर्राष्ट्रिय कवि एवं सांस्कृतिक सम्मेलन आयोजना हुने भएको छ। विराटनगरको सिटी प्यालेस होटल एण्ड रिसोर्टमा आयोजना हुन लागेको यस कार्यक्रमको आयोजना आभा फाउण्डेसन नेपाल र राष्ट्रिय कला सेवा संस्थान भारतले संयुक्त रुपमा गर्ने भएका छन्।

आयोजक संस्थाले आइतबार विराटनगरमा पत्रकार सम्मेलनको आयोजना गरी अन्तर्राष्ट्रिय कवि एवं सांस्कृतिक सम्मेलनको बारेमा जानकारी दिएका हुन्। आभा फाउण्डेसन नेपालकी अध्यक्ष आभा अनुपमा, राष्ट्रिय कला सेवा संस्थान भारतका अन्तर्राष्ट्रिय संयोजक अरविन्द श्रीवास्तव र आइडियल जर्नालिस्ट एसोसिएसन भारतका राष्ट्रिय महासचिव संजयकुमार पाण्डेले कार्यक्रमको विवरण प्रस्तुत गरेका थिए।

सम्मेलनमा नेपाल र भारतको परम्परागत पोशाकलाई प्रस्तुत गर्दै विशेष फेशन सो समेत आयोजना गरिने अध्यक्ष आभा अनुपमाले बताइन्। यसका साथै, नेपाल र भारतसहित विश्वका विभिन्न देशका कविहरू सम्मेलनमा सहभागी हुनेछन्।

सम्मेलनमा भारतका चर्चित भोजपुरी स्टार रवि किशनसहित दर्जनौँ भोजपुरी कलाकारहरूको उपस्थिति रहनेछ। दुई दिनसम्म चल्ने यो कार्यक्रममा नेपाल र भारतका संस्कृतिलाई जोड्ने विविध कार्यक्रम प्रस्तुत गरिनेछ।