विराटनगर / त्रेतायुगमा भगवान् श्रीराम र देवी जानकीबीच भएको वैवाहिक उत्सवको सम्झनामा मनाइने विवाह पञ्चमी पर्वको तयारी जनकपुरधाममा सुरु भएको छ। प्राचीन मिथिला र अवधबीचको ऐतिहासिक सम्बन्धलाई झल्काउने यो महोत्सवलाई भव्य बनाउन नेपाल र भारतका विभिन्न क्षेत्रका तिर्थालु तथा श्रद्धालुजन ठूलो संख्यामा जनकपुरधाम आउने अपेक्षा गरिएको छ।
मंसिर शुक्ल पञ्चमीका दिन पर्ने यस पर्वका लागि यस वर्ष विशेष तयारी गरिएको छ। जानकी मन्दिर, स्थानीय प्रशासन, प्रदेश सरकार, तथा विभिन्न संघ–संस्थाहरू र युवा क्लबहरूले महोत्सवलाई भव्य र सभ्य बनाउन संयुक्त रूपमा काम गरिरहेका छन्।
यस पटक विवाह पञ्चमीलाई थप विशेष बनाउन मिथिलाबाट अयोध्याको लागि ‘पाहुर’ सहितको निमन्त्रणा पठाइएको छ। मधेश प्रदेशका मुख्यमन्त्री सरोजकुमार सिंह, जनकपुरधाम उपमहानगरपालिकाका प्रमुख मनोजकुमार साह, प्रदेशका मन्त्रीहरू, तथा विभिन्न संघ–संस्थाका प्रतिनिधिहरू गरी २५० भन्दा बढीको टोली निमन्त्रणा पुर्याउन भारतको अयोध्या गएको छ।
सप्ताहव्यापी रूपमा आयोजना हुने यो पर्वको क्रममा विवाहकै शैलीमा जन्तीलाई स्वागत गर्ने, मण्डप सजाउने, विभिन्न सांस्कृतिक कार्यक्रमहरू सञ्चालन गर्ने, र मिथिला र अवधको सांस्कृतिक र धार्मिक सम्बन्धलाई उजागर गर्ने कार्यक्रमहरू तय गरिएका छन्।
यो महोत्सवले नेपाल र भारतबीचको सांस्कृतिक एकता र धार्मिक सहकार्यलाई थप मजबुत बनाउने विश्वास लिइएको छ। जनकपुरधामका स्थानीय बासिन्दा र व्यवसायीहरू पनि महोत्सवलाई भव्य बनाउन सक्रियताका साथ सहभागी भइरहेका छन्।
जनकपुरधाम पुग्ने तिर्थालुहरूका लागि बसोबास, भोगपूजा, तथा अन्य व्यवस्थापनको तयारी पनि लगभग पूरा भएको जनाइएको छ। मिथिला संस्कृतिको धरोहर मानिने विवाह पञ्चमी पर्वले जनकपुरधामलाई अझ चर्चित धार्मिक पर्यटन गन्तव्यको रूपमा उभ्याउने अपेक्षागरिएको छ।