विराटनगर / नेपालको जलवायु परिवर्तन अनुकूलन प्रयासलाई सुदृढ पार्ने उद्देश्यले नेपाल र स्वीडेनबीच पहिलो पटक कार्बन व्यापारसम्बन्धी पेरिस सम्झौताको आर्टिकल ६ अन्तर्गत दुईपक्षीय सम्झौता भएको छ। इटालीको दुबईमा आयोजित ‘कोप-२९’ सम्मेलनका क्रममा भएको यो सम्झौताले नेपालमा कार्बन व्यापार र जलवायु वित्तका सम्भावनाहरूलाई व्यापक बनाउन सहयोग गर्नेछ।
सम्झौताले नेपालको राष्ट्रिय निर्धारित योगदान (एनडीसी) कार्यान्वयनमा टेवा पुर्याउँदै जलवायु परिवर्तनका असरहरू न्यूनीकरण गर्ने लक्ष्य राखेको छ। यसमार्फत नेपालले कार्बन व्यापारबाट उल्लेखनीय आर्थिक लाभ लिनुका साथै स्वच्छ ऊर्जा, वन संरक्षण, र हरित परियोजनाहरूलाई प्रवर्द्धन गर्ने अवसर प्राप्त गर्ने विश्वास लिइएको छ।
नेपाल सरकारका अनुसार, यो सम्झौता जलवायु परिवर्तन न्यूनीकरणका क्षेत्रमा अन्तर्राष्ट्रिय साझेदारीको महत्वपूर्ण उदाहरण बनेको छ। साथै, यसले नेपालको दिगो विकास र हरित अर्थतन्त्रलाई प्रवर्द्धन गर्न बल पुर्याउनेछ।
विशेषज्ञहरूका अनुसार, यो सम्झौता सफल कार्यान्वयन भएमा नेपालले कार्बन क्रेडिट बेच्ने माध्यमबाट वार्षिक करोडौँ डलर आम्दानी गर्न सक्नेछ। स्वीडेनले नेपालको जलवायु परियोजनाहरूमा लगानी गर्ने प्रतिबद्धता पनि जनाएको छ।