विराटनगर / जिल्ला ट्राफिक प्रहरी कार्यालय मोरङ र नेपाल प्रहरीको संयुक्त टोलीले लागूपदार्थ सेवन गरी सवारी साधन चलाउने १० जना चालकलाई नियन्त्रणमा लिएको छ। शनिबार विराटनगर महानगरपालिकासँग सीमा जोडिएको नेपाल-भारत सीमावर्ती क्षेत्रमा चेकजाँचको क्रममा उनीहरूलाई नियन्त्रणमा लिइएको हो।

जिल्ला ट्राफिक प्रहरी कार्यालय मोरङका प्रमुख प्रहरी निरीक्षक राजन लम्सालका अनुसार १५ वटा सवारी साधनको चेकजाँच गर्दा १० जना चालकले लागूपदार्थ सेवन गरेको पुष्टि भएको छ। तीमध्ये ५ जना सिटी सफारीका चालक र ५ जना मोटरसाइकल चालक रहेका छन्।

लागूपदार्थ सेवन गरी सवारी साधन चलाउनेलाई कानुनअनुसार दफा १६० को उपदफा १४२ बमोजिम १ हजार रुपैयाँ जरिवाना गरिने प्रावधान छ।

पछिल्लो समय विराटनगरमा सिटी सफारी चलाउनेहरूको संख्या बढिरहेको छ। तर, धेरैजसो सिटी सफारी चालकसँग सवारी चालक अनुमतिपत्र (लाइसेन्स) नभएको र केहीले लागूपदार्थ सेवन गरेर सार्वजनिक सवारी साधन चलाउँदा सर्वसाधारणको ज्यान जोखिममा परिरहेको प्रहरी निरीक्षक लम्सालले बताए।

सार्वजनिक सवारी साधनका यात्रुको सुरक्षा सुनिश्चित गर्न लागूपदार्थ सेवन गर्ने चालकविरुद्ध कडा कारवाही अगाडि बढाइने जनाइएको छ।