विराटनगर/ मोरङको बुढीगंगा गाउँपालिका–२ गंगाचौकमा रहेको विराट मेडिकल कलेज शिक्षण अस्पताललाई नेपाल सरकारले सम्मान गरेको छ।
नेपाल सरकार श्रम, रोजगार तथा सामाजिक सुरक्षा मन्त्रालयले मंगलबार काठमाडौंमा आयोजित कार्यक्रममा आर्थिक वर्ष २०८०/०८१ मा कोशी प्रदेशका स्वास्थ्य संस्थाहरू मध्ये उत्कृष्ट सेवा प्रवाह गरेको भन्दै उक्त अस्पताललाई सम्मान प्रदान गरेको हो।
७ औं सामाजिक सुरक्षा दिवसको अवसरमा प्रधानमन्त्री केपी शर्मा ओलीले सामाजिक सुरक्षा कोषमा सूचीकृत भई योगदानकर्ताहरूलाई निरन्तर स्वास्थ्य सेवा प्रदान गरेकोमा विराट मेडिकल कलेज शिक्षण अस्पतालका सिईओ डिनिस कार्कीलाई सम्मानपत्र प्रदान गरे।
विराट मेडिकलले प्रदेशभर सबैभन्दा बढी र प्रभावकारी स्वास्थ्य सेवा प्रवाह गर्दै आएको उल्लेख गर्दै सामाजिक सुरक्षा कोषले अस्पताललाई उत्कृष्ट सेवा प्रदायक संस्थाको रुपमा मूल्यांकन गरेको हो।
यस सम्मानले विराट मेडिकललाई थप प्रेरणा मिल्ने विश्वास गरिएको छ।