सुनसरी। सुनवर्षी नगरपालिकाको सदरमुकाम डाइनियामा नगरस्तरीय कार्यक्रमको आयोजना गरी ३३औँ अन्तर्राष्ट्रिय अपाङ्गता दिवस भव्य रूपमा सम्पन्न भएको छ।
कार्यक्रमको अध्यक्षता नगरपालिकाका सामाजिक विकास शाखाका संयोजक रमेशज्यूले गर्नुभएको थियो भने प्रमुख अतिथि सुनवर्षी नगरपालिकाका उपप्रमुख श्री मिरा देवी दास केवरतज्यू रहनुभएको थियो। कार्यक्रममा महिला बाल विकास शाखाका प्रमुख अरुणा ज्यू, विराटनगर आँखा अस्पताल रानीका प्रतिनिधि दिलिप सिंह, सुनवर्षी नगरपालिका वडा नम्बर ९ का वडा सदस्य श्री जगदीश सहनीलगायत विभिन्न विशिष्ट व्यक्तित्वहरूको उपस्थिति थियो।
कार्यक्रममा अपाङ्गता भएका व्यक्तिहरूको अधिकार, अवसर, र समावेशिताका विषयमा चर्चा गरिएको थियो। नगरपालिकाले यस दिवसलाई अपाङ्गता भएका व्यक्तिहरूका हकहितका कार्यक्रमहरूको सुरुवात गर्ने अवसरका रूपमा लिएको जनाएको छ।
उपस्थित वक्ताहरूले अपाङ्गता भएका व्यक्तिहरूको समान सहभागिता सुनिश्चित गर्न समाज र सरकार दुवैको महत्त्वपूर्ण भूमिका रहेको औंल्याएका थिए। दिवसको अवसरमा विभिन्न सचेतना कार्यक्रम र अपाङ्गता भएका व्यक्तिहरूलाई प्रोत्साहन गर्ने गतिविधिहरू पनि आयोजना गरिएको थियो।
कार्यक्रमले समुदायमा अपाङ्गता भएका व्यक्तिहरूप्रति सकारात्मक दृष्टिकोण विकास गर्न महत्त्वपूर्ण योगदान पुर्याउने अपेक्षा गरिएको छ।
