विराटनगर/ नेपाली कांग्रेसका वरिष्ठ नेता डा. शेखर कोइरालाले कोशी प्रदेशको आज शनिबार सुरु भएको पार्टी सम्मेलनमा सहभागी नहुने निर्णय गरेका छन्। विराटनगरमा भइरहेको उक्त सम्मेलनका लागि पार्टी सभापति शेरबहादुर देउवा उपस्थित भइसकेका छन्, तर कोइरालाले चितवनका दुई शोकसभामा सहभागी हुने भन्दै सम्मेलन बहिष्कार गरेका हुन्।
कोइरालाले सम्मेलनमा वरीयता विवादका कारण सहभागिता जनाउन अस्वीकार गरेका हुन्। उनका अनुसार मञ्चमा सभापति देउवापछिको वरीयतामा आफू हुनुपर्ने माग भए पनि पार्टीले केन्द्रीय वरीयता प्रणालीअनुसार मर्यादाक्रम निर्धारण गरेको छ। यसले असन्तुष्टि बढाएको बताइएको छ।
यस विषयमा कोइरालाको निकट स्रोतले बताएअनुसार, वरीयता विवाद समाधान नगरेसम्म सम्मेलनमा सहभागी नहुने अडान कोइरालाले लिएका छन्।
चितवनमा कोइरालाले पार्टीका पूर्वसदस्य उद्धव लोहनीका पिताको शोकसभा र केन्द्रीय सदस्य दिनेश कोइरालाका पिताको शोकसभामा सहभागी हुने जनाइएको छ।
यसअघि, मंसिर १८ गते कोइरालाले विराटनगरमा पालिका सभापतिहरूको भेला आयोजना गरेका थिए, जहाँ १ सय १३ पालिका सभापति सहभागी भएका थिए। उक्त भेलाबारे सभापति देउवालाई जानकारी नभएको प्रतिक्रिया दिएका छन्।
यस घटनाले नेपाली कांग्रेसभित्रको आन्तरिक विवाद थप सतहमा आएको देखिएको छ। कोशी प्रदेश सम्मेलनले पार्टीभित्रको आन्तरिक सन्तुलन र नेताहरूबीचको समन्वयका लागि नयाँ चुनौती खडा गरेको छ।