विराटनगर/ झापाको गौरीगञ्ज गाउँपालिका–४, बारासुतीमा आज साँझ आगलागी हुँदा ३ विगाह खेतमा राखिएको धानको कुन्यू पूर्णरूपमा जलेर नष्ट भएको छ। सहदेव भनिने श्रीदेव राजवंशीको खेतमा साँझ करिब ६ बजेतिर अचानक आगो लागेको हो।

आगलागीबाट करिब ३ लाख रुपैयाँ बराबरको क्षति भएको अनुमान गरिएको छ। धानको कुन्यूमा आगलागी के कारणले भयो भन्नेबारे अनुसन्धान भइरहेको प्रहरीले जनाएको छ।

प्रहरी चौकी खजुरगाछी र इलाका प्रहरी कार्यालय गौरीगञ्जबाट खटिएको प्रहरी टोली, स्थानीयबासी, र गौरादह नगरपालिकाको दमकलको सहयोगमा आगो साँझ ६:५० बजे पूर्णरूपमा नियन्त्रणमा आएको थियो।

आगलागीको कारणबारे थप अनुसन्धान भइरहेको प्रहरीले जानकारी दिएको छ। यस घटनाले कृषक राजवंशीलाई ठूलो आर्थिक क्षति पुर्‍याएको छ।