विराटनगर। विराटनगरमा शुक्रबार साइकलयात्रीको दुर्घटनामा मृत्यु भएको विषयलाई लिएर तनाव उत्पन्न भएको छ। विराटनगर भन्सार कार्यालय क्षेत्रमा आक्रोशित भिडले ढुंगा प्रहार गर्दै तोडफोडको प्रयास गरेको छ, जसलाई नियन्त्रणमा लिन प्रहरीले अश्रुग्यास प्रयोग गर्नुपरेको छ।

घटनाको सुरुवात बिहीबार साँझ विराटनगर–१८ स्थित आईसीपी रोडमा भएको दुर्घटनाबाट भएको हो। ना ४ ख २४८३ नम्बरको ट्रकले साइकलमा यात्रा गरिरहेका ६० वर्षीय श्याम साहलाई ठक्कर दिएको थियो। ट्रकको तीव्र गतिका कारण भएको दुर्घटनापछि साहलाई विराट नर्सिङ होम लगिएको थियो, जहाँ चिकित्सकले उनलाई मृत घोषणा गरेका थिए।

दुर्घटनापछि प्रहरीले ट्रक चालक दीपक यादवलाई नियन्त्रणमा लिएको छ। मृतकका आफन्तहरूले ट्रक चालकको लापरबाहीका कारण दुर्घटना भएको दाबी गर्दै शव बुझ्न अस्वीकार गरेका छन्। यस कारण शव अहिले पनि अस्पतालमै छ।

दुर्घटनापछि आक्रोशित भिडले भन्सार कार्यालयमा ढुंगा मारेको र तोडफोडको प्रयास गरेको मोरङका डीएसपी वेदप्रकाश जोशीले जानकारी दिएका छन्। भन्सार कार्यालयको गेट र भवनमा क्षति पुगेको छ भने केही शिशा फुटेका छन्। भिडलाई नियन्त्रणमा लिन १० सेल अश्रुग्यास प्रहार गरिएको थियो, जसमा प्रहरी सहायक निरीक्षकसहित ४ जना प्रहरी सामान्य घाइते भएका छन्।

हाल स्थिति सामान्य रहेको प्रहरीले जनाएको छ। पीडित पक्षसँग वार्ता गरी समस्या समाधानको प्रयास भइरहेको पनि डीएसपी जोशीले बताए।