बिराटनगर/ झापा, सुनसरी, र उदयपुरका विभिन्न स्थानहरूबाट प्रहरीले लागुऔषध सहित ६ जनालाई पक्राउ गरेको छ।

पुस ११ गते, झापाको बिर्तामोड नगरपालिका-१ स्थित बस स्टेण्डमा इलाका प्रहरी कार्यालय अनारमनीबाट खटिएको प्रहरी टोलीले इलाम सुर्योदय नगरपालिका-८ का २८ वर्षीय सुमित श्रेष्ठलाई ६ ग्राम १५० मिलिग्राम ब्राउन सुगर सहित पक्राउ गरेको छ। त्यस्तै, दमक नगरपालिका-४ का २१ वर्षीय सन्देश राईलाई १ ग्राम २०० मिलिग्राम ब्राउन सुगर सहित झापा गाउँपालिका-४ बाट इलाका प्रहरी कार्यालय कुमरखोदले नियन्त्रणमा लिएको हो।

सुनसरी जिल्लाको ईनरुवा नगरपालिका-२ का २५ वर्षीय अजय कुमार मण्डललाई २७० मिलिग्राम ब्राउन सुगर सहित जिल्ला प्रहरी कार्यालय सुनसरीले पक्राउ गरेको छ। बराहक्षेत्र नगरपालिका-२ का २६ वर्षीय विज्ञान राईलाई प्रतिबन्धित औषधी ट्रामाडोलका ९१ ट्याब्लेट सहित इलाका प्रहरी कार्यालय चतराले नियन्त्रणमा लिएको छ।

त्यसैगरी, इलाका प्रहरी कार्यालय रामपुर ठोक्सिलाबाट खटिएको टोलीले चेकजाँचका क्रममा को.१ प ११६२ नम्बरको मोटरसाइकलमा यात्रा गरिरहेका बेलका नगरपालिका-२ का २४ वर्षीय प्रमोद चौधरी र २६ वर्षीय रोशन चौधरीलाई २ किलोग्राम गाँजासहित पक्राउ गरेको छ।

पक्राउ परेकामाथि लागुऔषध नियन्त्रण ऐन अन्तर्गत आवश्यक अनुसन्धान र कानूनी प्रक्रिया अगाडि बढाइएको प्रहरीले जनाएको छ।